Die nuwe Graad 8 – leerders betower jaarliks die skool met ‘n vertoning uit die boonste rakke! Die vertoning word van begin tot einde deur die Senior VLR aanmekaargesit.
Tydens die eerste week van skool oefen die groepe kliphard om ‘n goeie vertoning aanmekaar te sit sodat hulle in week twee ‘n suksesvolle “Aand van die sterretjies” vir die skool se leerders, personeel en ouers kan opvoer.
Baie geluk aan die Pietieraad wat weer gesorg het vir ‘n voortreflike funksie! Hierdie aand bly ‘n hoogtepunt op die Pietie-kalender! Vanjaar was die 25ste keer wat hierdie spoggeleentheid aangebied is by PHS.
Die 10 finaliste het weereens ‘n onvergeetlike aand op die planke gebring.
Baie geluk aan 2023 se Mnr en Mej PHS, Zarich Lourens en Joné Potgieter.
Soos met meeste ander geleenthede, gaan PHS se personeel en leerders ook gróót met Valentynsdag. Hierdie geleentheid word gereël deur die Gr. 11’s as fondsinsamelingsgeleentheid vir die matriekafskeid. Elke graad 11 klas is verantwoordelik vir ‘n stalletjie. Die stalletjies verkoop dan heerlike eetgoed, soetgoed en verskeie speletjies kan ook gespeel word.
Daar is jaarliks ‘n unieke tema waarvolgens die leerders aantrek. Die leerders kry die kans om groot te gaan met hul kleredrag vir die dag.
Die Valentynsbal is elke jaar ‘n stylvolle geleentheid en die Gr. 11 personeel, leerders en hul ouers doen baie moeite om dit ‘n hoogtepunt op die kalender te maak.
Daar word jaarliks 2 verskillende danse aangebied, die hoofbal is vir die seniors van die skool (Gr. 10-12) en die juniors (Gr 8-9) se bal word apart gehou op ‘n ander aand. Tydens elke dans word die saal stylvol opgemaak volgens die gegewe tema. Vanjaar se tema is Mafia.
