PHS se Pietieraad, onder meer die Sosiale komitee, is verantwoordelik vir hope pret hier by die skool. Die sosiale komitee voorsitters maak seker dat daar gereeld geleenthede is vir die skool se onderwysers en leerders om te ontspan.
Hierdie geleenthede sluit in Nasionale Melktertdag – waar elke graad melktert skool toe bring om vas te stel wie die lekkerste melktert kan bak in PHS. Ander geleenthede soos braai in die graadblokke en verskeie sokkies val ook onder hulle portefeulje.
Die nuwe Graad 8 – leerders betower jaarliks die skool met ‘n vertoning uit die boonste rakke! Die vertoning word van begin tot einde deur die Senior VLR aanmekaargesit.
Tydens die eerste week van skool oefen die groepe kliphard om ‘n goeie vertoning aanmekaar te sit sodat hulle in week twee ‘n suksesvolle “Aand van die sterretjies” vir die skool se leerders, personeel en ouers kan opvoer. Die Pietieraad sit ure en ure se oefening in om hulle graad 8 groepe gereed te kry vir die Gala-aand optrede waar die wenners aangekondig word.
Die sêrrie-kompetisie is vanjaar reeds 53 jaar deel van PHS se trotse tradisie. Die trofeë is ‘n pop wat in 1968 deur me Heila Genis aan die skool geskenk is. Die kompetisie word uitgespook tussen die onderskeie grade volgens vasgestelde riglyne.
Elke graad se dirigente het slegs ‘n week om die graad voor te berei vir die groot aand se optrede.
Tydens die aand kom die hele dorp bymekaar vir die aand se verrigtinge asook lekker pannekoek en koffie.
Hierdie aand bly ‘n hoogtepunt op die Pietie-kalender! Tydens die spoggeleentheid sorg die Pietieraad vir ‘n onvergeetlike funksie. Die 10 finaliste spog met hul skoonheid tydens die formele loop en woeker met hul talente op die beoordelaars te beïndruk.
Baie geluk aan 2024 se Mnr en Mej PHS, Alex Marais en Nicky Faul.
Soos met meeste ander geleenthede, gaan PHS se personeel en leerders ook gróót met Valentynsdag. Hierdie geleentheid word gereël deur die Gr. 11’s as fondsinsamelingsgeleentheid vir die skool se matriekafskeid. Elke graad 11 klas is verantwoordelik vir ‘n stalletjie of selfs lekker speletjies tydens pouse. Die stalletjies verkoop dan heerlike eetgoed van soetgoed tot yskoue koeldranke.
Daar is jaarliks ‘n unieke tema waarvolgens die leerders aantrek. Die leerders kry die kans om groot te gaan met hul kleredrag vir die dag.
Die Valentynsbal is elke jaar ‘n stylvolle geleentheid en die Gr. 11 personeel, leerders en hul ouers doen baie moeite om dit ‘n hoogtepunt op die kalender te maak.
Daar word jaarliks 2 verskillende danse aangebied, die hoofbal is vir die seniors van die skool (Gr. 10-12) en die juniors (Gr 8-9) se bal word apart gehou op ‘n ander aand. Tydens elke dans word die saal stylvol opgemaak volgens die gegewe tema.
