Met ‘n ryke geskiedenis van 94 jaar, is verskeie betekenisvolle tradisies by PHS gevestig. Die voortsetting van die tradisies word as prioriteit beskou en stel ‘n goeie voorbeeld aan ons leerders ten einde die waarde en betekenis van hierdie tradisies by hulle te vestig.
Eerste span – rugbytrui
Die trui is in 1937 ontwerp en word vir die afgelope 78 jaar onveranderd gebruik. Deur die jare het honderde rugbyseuns die voorreg gehad om die wittrui met die kenmerkende groen-, rooi- en bloustrepe oor die bors, oor die kop te trek. Ons vier Springbokke, Joe Kaminor, Adolf Malan, Victor Matfield en Deon Fourie (7’s) het ook die voorreg gesmaak.
Kardoesie
Dié sêrrie-kompetisie het sy ontstaan in 1968 gehad toe ‘n St9-leerling, Heila Genis, ‘n langbeenpop aan die skool geskenk het. Waar die vier koshuise en die dagleerlinge destyds om dié gewilde meisie meegeding het, loop dié kompetisie vandag ewe sterk tussen die huidige vyf grade.
Die tradisie wil dit hê dat Kardoesie in die kluis gebêre word tot voordat sy haar verskyning by die kompetisie maak. Die wengroep mag die volgende dag met haar op die terrein spog, waar sy gewoonlik deur een van die ander grade ontvoer word. Op ‘n dag maak sy weer haar verskyning en gaan terug kluis toe tot volgende jaar.
Kardoesie, PHS se amptelike simbool van kultuur, word verreweg as die gewildste tradisie beskou; jy is eenvoudig nie ‘n Pietie as jy nie ge-Kardoesie het nie.
Scottie
Daar is min skole in Suid-Afrika waar die hoofseun met sy eie ampsmotor kan spog. Scottie, ‘n 1954 Austin Morris, is deur die 2010-matrikulante aan die skool geskenk.
Die voorwaardes was duidelik:
Die Gr8’s moet op aandag staan as Scottie verby kom,
Scottie moet by al die amptelike funksies van die skool teenwoordig wees,
Die hoofseun en sy metgesel moet met Scottie na die matriekafskeid toe ry.
Dit is ook Scottie se voorreg om Kardoesie na haar groot aand aan te ry.
Scottie is PHS se amptelike simbool van tradisie
Poort na Kennis
PHS se simbool van akademie, die Poort na Kennis, word op die eerste skooldag van elke jaar, seremonieel geopen.
Die hoofleiers vra toestemming om die Poort binne te gaan, waarna die hoof die akademiese jaar as amptelik geopen verklaar.
Die Gr9 tot Gr12-leerders verkry dan toegang tot die vierkant vir die eerste opening van die jaar.
Na afloop van die Gr8’s se Aand van die Sterretjies-gala-aand, word hulle op dieselfde wyse toegang tot die skool verleen. Nadat hulle ‘n eed afgelê het, word hulle amptelik as Pieties verklaar.
Matriek-blok
Die matriekblok is in 2007 opgeknap kompleet met grasafdakkies, houtbankies en ‘n mini-amfiteater, toegerus met ‘n seremoniële posbus. Elke jaar op die matrieks se laaste skooldag, word die matriekblok amptelik aan die Gr11’s oorhandig, nadat die uittredende hoofleiers hul boodskappe aan die skool in die posbus gegooi het.
Die matrikulante stap dan vir die laaste keer na die vierkant, deur ‘n erewag wat die Gr11’s vir hulle vorm.
Die matriekblok word verreweg as “heilige grond” beskou en indien enige leerder uit Gr8 tot Gr11 daar gevang word, skryf die matrieks vir hom of haar ‘n gedig voor, wat tydens ‘n opening voor die hele skool voorgelees word.
Verder wat die posbus betref, het oud-Pieties wat die skool besoek, ook die voorreg om ‘n brief in te gooi. Die posbus gaan in 2021, wanneer PHS 100 jaar oud word, vir die eerste keer leeggemaak word.
Daar lê reeds briewe van Pieter Pieterse en Van Zyl Slabbert wat beide reeds oorlede is, asook van oud-Pieties soos minister Marthinus van Schalkwyk, Victor Matfield en Willem Roos (Stigter van Outsurance).
Storie-boom
Dié Wildevy boom, staan in die Gr11-blok en dien as die middelpunt van PHS se religie-aktiwiteite. Volgens oorlewering het die Storieboom sy naam te danke aan die feit dat hy so perfek soos ‘n boom uit ‘n storieboek lyk. Verder wil tradisie dit hê dat die matrieks elke jaar vir die Gr8’s stories onder die boom lees terwyl daar vir die Aand van die Sterretjies geoefen word.
